Willi-und-Heiner-Dialog 28
von de Ginder (copyright)
Heiner: Ei, guude
Willi: Ei, bei der Hitz geh´st du aus´m Haus?
Heiner: Was willst´n mache, wenn die Quelle versiesche!?
Willi: Ja, bei der Hitz, do trockend alles aus
Heiner: Des kannst laut saache – Verrzisch Grad im Schadde un de Getränkekaiser hod Urlaub
Willi: Hätt´st hald reschtzeidisch ä Kist mehr nemme solle
Heiner: Meu Alde mescht schon bei dem aane Kaste Uffständ, den isch die Woch gelieffert kriesch, was maanst dann du, wenn der mehr ablade däd, als normal!
Willi: Un jetzt kannsde derr die Flasche aanzeln beim Kämmerer seum Wasserhäuse hole und die Brüh leefd derr in die Aaschbacke
Heiner: Fehld nur noch än Herzkasper unn dann iss de Sommer komplett
Willi: So´n Sommer iss ja aach ned mehr normal
Heiner: Unn wer iss dran schuld?
Willi: Ei die Industrienatione mit ihrne Treibhausgase
Heiner: Kann schon seu, awwer isch glaab do steckt ä Verschwörung dadehinner
Willi: Üwwerall gibt´s jetzt Verschwörunge, merr waas gar ned mehr, ob mer dadehaam in seune vier Wänd ned aach noch Verschwörunge uffsitzt
Heiner: Unn früher had merr gesaachd: Die und die dess sinn verschworene Gemeinschafte
Willi: Die Betonung lieschd da aawer uff gemein
Heiner: Wass isch saache wolld iss, dass für die lang Trockeheid bestimmt die El Kaida dodehinner steckt
Willi: Ei, wie kimmst dann do druff?
Heiner: Die denge sisch doch dauernd was neues aus, um die Ungläubische auzurotte
Willi: Awwer wie solle dann die die Trockeheid verursacht hawwe
Heiner: Isch denk, die hawwe bestimmt so ä paar Wuuduu-Priester beufftrachd
Willi: Wuuduu-Priester?
Heiner: Die Wuuduu-Bimbos, die stesche doch mit so ner Nadel in ä Stoffpupp un dann verhexe die annern Leud
Willi: So än Bleedsinn hab isch lang ned gehört, wie soll dann des funktioniern?
Heiner: Das dess funktioniert iss bewiese, sonst deede die des doch ned dauernd mache, oder?
Willi: Dess schon, awwer wie soll dann dess mit der Trockeheid funktioniern?
Heiner: Ei, die nemme Kuhmist und Lehm, forme ä Kuchel, zeichne da Europa eu und steche dann da mit de Nadel äneu
Willi: Ned dumm
Heiner: Siehsde
Willi: Awwer Heiner, saach ämol, wenn´s bei uns ned reschend, dann reschends doch woannersder um so mehr, oder?
Heiner: Ei klar unn wie
Willi: Ei, dess maan isch ja, dademit schaufele die sisch doch ihr eischenes Grab, indem´s bei dene so schütt, dass die fortschwimme
Heiner: Sinn hald alles Selbstmordkommandos
Willi: Wenn mer´s so üwwerleschd
Heiner: Also isch schwitz misch dann ma widder weida
Willi: Machs guud
Heiner: Du aach