Die Fenstergucker: Sportlerehrung
von de Ginder (copyright)
Sie: Gugg, wie sich de Müller von driwwe uffgeputzt hat
Er: Iss jemand gestorwwe?
Sie: Nee du, der geht bestimmt zu der Sportlerehrung von de Stadt
Er: Woher waast’de des dann schon widder?
Sie: Zufällischerweise hab isch die Roth ma widder getroffe
Er: Un für was soll der dann geehrt wern, doch ned etwa für’s Radfahrn?
Sie: Wenn der für’s Radfahrn geehrt wird, wirst du für’s Blumegiesse geehrt
Er: Ei für was soll der dann sonst geehrt wern?
Sie: Isch glaab für seu fünfundzwanzischsdes Sportabzeiche
Er: So was wird geehrt?
Sie: Wenn se die Jedermannssportler mit ihre Abzeiche ned ehre däde, do könnte die ihr Veranstaltung doch gleisch zumache
Er: So viele solle des seu, die do geehrt wern?
Sie: Än ganze Stall voll
Er: Des iss ja echt lächerlisch, Leut für des Sportabzeiche zu ehrn, die müsse aa Rund um de Platz laafe, Hauptsach, die komme an
Sie: Da gibt’s ja so verschiedene Alterklasse, de Müller derft so in M50 seu, do muß mer ja ned mehr so schnell wie die Junge seu
Er: Am schnellste iss der hinnerher an de Theke
Sie: Vielleischt iss der ja aach deutscher Meister im Kampftrinke geworn
Er: Und wer wird dann noch so alles geehrt, waasde noch jemanden?
Sie: Ei, sischer, de Faust Dieter, zum Beispiel
Er: De Faust?
Sie: Sischer!
Er: Awwer für was soll dann der geehrt wern, der hat doch nur noch aa Baa?
Sie: Waasd dann du ned, daß der Behinnerdesport mäscht?
Er: Woher soll isch des dann wisse? Was mescht dann der für än Behinnerdesport, vielleischt Rollstuhlweitwurf oder wie?
Sie: Dabbes, der iss doch bei de Sitzballer
Er: Un was sinn die geworn ?
Sie: Europameister
Er: Da hawwe die quasi in de Tschämpiensliescha gespielt
Sie: Tschämpiensliescha?
Er: Ei dodefo hast du kaa Ahnung, wenn’s um Fußball geht
Sie: Wer hatt’n gewußt, was der spielt, du oder isch?
Er: Iss ja schon gut, isch fraach misch halt nur, wie die Behinnerde im sitze uff so äm große Fußballfeld Tor’n schiesse kenne
Sie: Die spiele des doch in de Halle
Er: Hätt misch aach gewunnert
Sie: Manschma denk isch, daß du ä bissi bleed bist
Er: Warum dann des?
Sie: Du krieschsd scheinbar gar nix mehr mit, was in de Welt so vor sisch geht
Er: Bloß, weil ich des mit dem Faust Dieter ned gewußt hab? Jetzt heer awwer ma uff du. Dodefer kriesch isch üwwer’s Fernseh jede Menge mit, was in de Welt so vor sisch geht
Sie: Wenn die Russe komme dede un die da unne am Fenster vorbeilaafe dede, dedst du misch noch fraache, ob des än Fassnachtsumzuch wär
Er: Warum bist’n so aggressiv heut? Hat disch etwa die Roth aagesteckt?
Sie: Mit was soll isch misch dann bei der aagesteckt hawwe?
Er: MKS
Sie: Mit was?
Er: Ei, mit der Maul- und Klugscheisser-Seuche
Sie: Werd ma ned fresch jetzt, sonst versteck isch die Fernbedienung, wenn de Jauch heut Abend kimmt
Er: Iss ja schon gut, bin ja widder friedlisch