Die Fenstergucker: Nervesäsche
von de Ginder (copyright)
Sie: Der Willibald nervt heut awwer widder unner aller Sau
Er: ‘S geht äm Winter zu
Sie: So viel schneie kanns bei uns doch gar ned, wie der Holz mäschd
Er: Wenn Gebete erhört wern däde, däd dem seu Kreissäsch jetzt verrecke
Sie: Un dem seun Kreislauf noch dadezu
Er: Des war jetzt awwer ä bissi hart
Sie: Des Lewwe iss hart
Er: Kennste den Spruch: Wen Gott liebt, den holt er zu sisch?
Sie: Den kenn isch, de Willibald kann de liewwe Gott also ned lieb hawwe
Er: Sieht so aus!
Sie: Was will de liewwe Gott aach mit so äm Krachmacher im Himmel?
Er: Stell derr ämol vor, de Willibald kimmt in de Himmel und nirschends iss ä Kreissäsch zu finne
Sie: Ei, der wird verrieggd
Er: Verriegd iss der doch schon lang
Sie: Was der an Holz do zu sitze had, des langt mindestens für zwanzisch sibirische Winter
Er: Mindestens
Sie: Unn stinke tut dem seun Kamin dann aach noch mindestens zwanzisch Jahr
Er: Ei, mannst dann du, daß bei dene Ölpreise noch irschendjemand uff irschendwas ä Rücksischt nemme ded?
Sie: Ei, do misse merr halt aach uff Holz umsteische, aach wenn’s dann stinke sollt
Er: Unn wer soll uns des Holz dann bringe unn klaamache?
Sie. Ei du, du Dabbes, wer dann sonst?
Er: So weit käms noch, daß isch hier de Aff mach, nur weil de Hobbyholzfäller do newweaa än Holzklaaschneidtick hatt
Sie: Ä bissi Beweschung könnt dir gar ned schade
Er: Unser aans iss froh, wenn die Kautsch uff aan wart
Sie: Üwwerlesch doch ämol, was mir do sparn könnte im Jahr, wenn mir mit Holz heize däde
Er: Saach ma, willst du mich mit aller Gewalt zu äm Herzinfaktkandidate mache?
Sie: Mäusje, wo denksde dann hie? Schon ämol was von Fitness gehört?
Er: Nach dem Motto: Nur die Stärkste üwwerlewwe?
Sie: Quatschkopp, reschne derr doch nur ämol aus, was mir do im Jahr sparn däde – isch denk, do iss mindestens än Urlaub drin
Er: Ei, wo dann? Uff so äner Fittnessfarm? Wo de de ganze Daach geqäult und eugeschmiert werst? Nee du, dodefer hack isch doch kaa Holz.
Sie: Ei gugg der doch de Willibald und die Karla aa – die gönne sisch jedes Jahr ihrn Urlaub und sehn blendend aus
Er: De Willibald had ja aach nix zu melde dehaam
Sie: Wieso had der nix zu melde?
Er: Ei, wenn der was zu melde hätt, däde die ned jed Jahr wegfahrn
Sie: Ei warum dann ned?
Er: Ei, weil der immer total aus seum Rhythmus kommt
Sie. Was für’n Rhythmus?
Er: Hast du ned gesehe was der für Schwierigkeide hat, wenn der aus’m Urlaub zurück kimmt?
Sie: Was maanste dann?
Er: Ei, isch maan, wie der sisch schwer dud, nach seum Urlaub in den gewohnte Kreissäscherhytmus zurückzukehre
Sie: Erzähl hier nix vom Pferd. Apropo – ‘s wird Zeit, daß de in deun tächlische Mühlaamer- Entleerungs-Rhythmus kimmst – awwer ä bissi flott -’s stinkt schon in de Küsch
Er: Kaa Panik, lass ämol den Wilibald zuend säsche, dann bring isch des Stinkische schon zur Mülltonn
Sie: Awwer ned, daß de de Deckel widder zumäscht, wie’s letzte ma
Er: Bin isch dann bleed? Der soll doch aach seun Spass hawwe, wenn mir de ganze Daach Lärm hawwe
Sie: Hoffentlisch kimmt de Wind aus de rischdisch Rischdung
Er: Hoffe mer’s – zumache kenne merr den Deckel ja noch immer
Sie: Komm in die Gänge
Er: Der säscht doch noch
Sie: Awwer die Karla doch ned
Er: Du maanst, die könnt schon ämol ä Prise nemme?
Sie: Sischer – unn vergeß ned des alde Katzefutter in die Mülltonn zu lesche
Er: Dess alaa däd ja schon reische um ä Kompanie auszuräuschern
Sie: Wer säschd, muß leide
Er: Auche um Auche
Sie: Wer klaabeigibt verliert
Er: Des kenn isch aus de eischene Reihe
Sie: Was maanst de dann jetzt schon widder?
Er: Nix!
Sie: Dann iss ja gut!