Die Fenstergucker: Fußballer und Streiker
von de Ginder (copyright)
Sie: Do, gugg derr nur die Deppe oo, als däd die Welt nur aus Fußball bestehe
Er: So iss es Lewwe ewwe, die aane wern Meister und die anner gugge ins Oferohr
Sie: Des müßt mer eischendlisch verbiede, daß in Hesse Bayern mit ihrne Fahne in Cabrios ärumfahrn derfe
Er: Dodebei hamm die blöde Bayern widder ma nur Suff gehabt
Sie: Aa Minut, un die da mit ihrne Fahne wärn jetzt dehaam bei de Mama und däde Rotz un Wasser heule
Er: Iss die Welt ned ungerescht?
Sie: Isch hab zwar kaa Ahnung vom Fußball, awwer dene Schalker hätt isch des dreimol mehr gegönnt, als dene arogande Bayern aamol
Er: Soll isch ma än Aamer Wasser hole? Wenn se nochma vorbeikomme, schütt isch dene was in ihrne Cabrios
Sie: Mach des ruhisch, des Gejole und Gehupe geht aam ja uff’n Keks
Er: So wie’s aussieht iss jetzt awwer Ruh
Sie: Sieht so aus
Er: Eischendlisch iss es jetzt wie totestill, komisch
Sie: Iss merr vorhin, als die Deppe noch ned krackehlert ham, aach schon uffgefalle, ‘s iss heut ufffällisch ruhisch, irschendwas stimmt ned
Er: Mer muß ja rischdisch flüstern, damit die Nachbarschaft ned mitkriescht, was mer so saache
Sie: Jetzt hab isch’s. Lufthansastreik!
Er: Jetzt wodes sächst, fällt mer’s aach uff, viel wenischer Fluchlärm wie sonst, merr had sisch ja schon rischdisch dodedra gewöhnt gehabt an den Krach
Sie: Kann mer ma sehe, an was sisch de Mensch alles gewöhnt
Er: Isch hab misch sogar an disch gewöhnt
Sie: Sei ned so fresch, sonst frißde heut Awwend deu Schnitzel roh
Er: Wor ja nur än Spaß
Sie: Eischendlisch könnte die ja öfter ma streike und die annern Fluchlinie gleisch dodezu
Er: Isch hätt do nix dadegescher
Sie: Fünfunndreißig Prozent mehr wolle die Hirnverbrannte
Er: Von mir aus könne die hunnertprozent mehr verlange, mir fliesche ja eh ned
Sie: Außer mir gewinne im Lotto
Er: Ned ämol do däd isch fliesche, do däde mer mit’m ICE fahre
Sie: Nach Amerika?
Er: Was willste dann in Amerika?
Sie: Gränd Cänijen, Niagarafäll, Rut Sixdisixdi, Raddampfer fahrn – ach, mir däd schon noch mehr eufalle
Er: Misse mir do nach Amerika?
Sie: Du kannst Fraache stelle
Er: Ei des gibt’s doch aach bei uns
Sie: Ei wo dann?
Er: Gränd Cänijen, des iss doch wie in Binge am Rhein, Niagarafäll gibt’s in Schaffhause, Rut Sixdisixdi, des iss die A3 un Rad oder Dampfer kannsde hier immer fahrn
Sie: Spinner
Er: Ei isch fliesch doch ned mit dene Halsabschneider von Lufthansafluchkapitäne
Sie: Die müßte die Lufthansa so beukodiern, daß die so zusammeklappe, daß die am Schluß für fünfundreißisch Prozent wenischer fliesche däde, nur damit se ned awweitslos wern
Er: Apropo awweitslos. Waasde was mir de Fritz heut früh beim Brötscherhole erzählt had?
Sie: Was dann?
Er: De Schütz Walter ham se entlasse
Sie: Der had doch beim Farwwe-Weiss geschafft
Er: Sechsunzwanzisch Jahr war der dort
Sie: Un warum ham se den entlasse?
Er: Der iss zu seum Chef hie und had fünfundreißig Prozent mehr Lohn gefordert
Sie: Do häd isch den awwer aach entlasse
Er: Der Clou iss ja, daß der entlasse wern wollt
Sie: Hä?
Er: Ja, der had den Rausschmiss rischdischgehend provoziert. Der iss jetzt an die Sechzisch und will’s Lewwe vor de Rente noch ä bissi uff koste von dene in Nürnbersch geniesse
Sie: Ned dumm. Sinn dann die Lufthansafluchkapitäne aach all so alt wie de Schütz Walter?
Er: Könnt seu
Sie: Dann wunnert misch nix mehr mit dene ihrne Forderunge
Er: Misch aach ned!