Die Fenstergucker: Erwwe
von de Ginder (copyright)
Sie: Da gugg, die Mehlbrescht
Er: Unn?
Sie: Die hat doch geerbt
Er: Na unn?
Sie: Ei, die rennt neuerdings nur noch ins Feinkostgeschäft
Er: Gibt’s da besser Lewwerworscht als beim Helfrisch seuner Metzgerei?
Sie: Vielleischt sieht die Verpackung besser aus, awwer besser kann die nimmer unn nie seu
Er: Dadefer kost die Verpackung dann des dreifache wie die Lewwerworscht alaa beim Helfrisch
Sie: Des kannsde singe, du
Er: Stimmt, wenn des so sächsd, fällt merr uff, daß die Mehlbrescht de Kopp äbbes höher träscht, als sonst. Awwer saach ma, waast du wieviel die eischendlisch geerbt hat?
Sie: Was waas dann isch? Millione wern’s ned gewese sei, sonst wär die längst in Malibu in Kann oder sonstwo.
Er: Un hasde aach gehört, von wem die geerbt hat?
Sie: Ei, so wie mers die Paula erzählt hat, hat die von ihrm Vadder geerbt
Er: Komisch, daß immer nur annern von ihrm Vadder was erwwe
Sie: Ja, dein Vadder hat ja aach alles in die Wertschaft getraache, da konnt der nix mehr vererwwe
Er: Komm, jetzt mach awwer ma langsam. Mein Vadder hat sisch sein Lebdaach de Buckel krumm geschafft für seu Familie
Sie: Iss ja gut, awwer ischendwie iss des Lewwe ungerescht – die aane schaffe sisch de Buckel krumm unn komme uff kaan griine Zweisch und die annern kriens in de Aasch geschmiert
Er: Da gugg, die Roth kimmt – hat bestimmt widder ä paar Neuischkeide
Sie: Gudde Morsche Frau Roth
Frau Roth: Morsche
Er: Moin
Sie: Saache se ma, Frau Roth, stimmt des, daß die Mehlbrescht geerbt hätt?
Frau Roth: Von weesche geerbt, wisst ihr dann ned, daß die von ihrm Vadder nur Schulde geerbt hat?
Sie: Schulde?
Frau Roth: Ei, der ihrn Vadder hat doch seu Haus mit ä Hypothek belast, damit er seu Babscherbuud üwwer Wasser halde konnt
Sie: Do had die awwer des Erwwe sischer ned aagenomme, oder?
Frau Roth: Wär se ja schee bleed gewese, wenn se des aangenomme hätt
Sie: Ja awwer misch wunnert nur, warum die neuerdings im Feinkostgeschäft driwwe in de Karlstroß eukaafe dud
Frau Roth: Ei, wissese dann ned, daß die neuerdings do putze geht?
Sie: Jetzt waas ischs
Frau Roth: Awwer jetzt muß isch wieder, mein Ewin will was zu futtern
Sie: Na dann
Er: Mache ses guud
Sie: Die bleed Paula erzählt awwer aach en Dreck, von weesche geerbt
Er: Awwer geerbt hat se doch die Mehlbrescht
Sie: Geerbt hab isch, wenn isch was uff die Flosse
kriesch
Er: Awwer aans wunnert misch doch
Sie: Ei, was dann?
Er: Warum die Mehlbrescht jetzt de Kopp höher träscht!
Sie: Do hasde rescht, des iss merkwürdisch, könnt ja seu, daß de Vadder der Schmuck vererbt had, wo kaaner was von waas
Er: Könnt seu, awwer dann däd die doch ned putze gehe
Sie: Des mescht die doch nur, daß kaaner merkt, daß die Schmuck geerbt had
Er: Die iss ja ä ganz raffiniert Luder
Sie: Awwer uns kann die ned täusche
Er: Mir sann doch ned bleed