The-Short-Story

von de Ginder (copyright)

Sie: Kannst du mer maa saache, wer die Hitz do bestellt hod?
Er: Des kann isch der saache, die bleede Sonneanbeeder

Sie: Vierundreisisch Grad unnerm ausgeklappte Rollade, des hält doch kaa Sau aus
Er: Die wolles ja ned annerster, die Bleede

Sie: Da schwitzt mer ja schon, wenn mer nur ma uffs Klo geht und drückt
Er: `S ganze Jahr schreie se nach de Sonn, dodebei iss es doch am scheenste so um die vierunzwanzisch Grad mit äm leichte Lüftscher

Sie: Genau, awwer wenn die Wetterkart ned ä riesisch Sonn üwwer ganz Deutschland zeischt, dann iss bei dene de Daach gelaafe
Er: Möscht wisse, was die Bagasch jetzt so mäscht, außer sich’s Ozon euzuverleiwwe

Sie: Volle Pulle in die Sonn geknallt, damit mer aach sieht, wie braun än Bleede wern kann
Er: Ei die nutze des halt aus, do sparn die jede Menge, wenn se ned ins Sonnestudio müsse

Sie: Awwer braun müsse se wern, die eitle Fratze
Er: Geheert halt zum Jungseu wie’s Ozon zu den Sonn

Sie: Unn dann in dene Schwimmbäder noch ä Portion Chlor eugeschnüffelt und am Mondach geht’s zum Dokter, weil sisch Allergije eugestellt hawwe

Er: Un des widder ma alles uff unser Koste
Sie: Un die Waldbränd, was die erst koste, ‘s ganze Klima geht de Bach änunner
Er: Apropo Waldbränd. Hast du gewußt, daß die von de freiwillisch Feuerwehr Auslaacheersatz kriesche, wenn die zu so äm Brand gerufe wern?

Sie: Nö du, isch hab gedacht, daß des freiwillisch wär
Er: Von wesche, die kassiern bei so Eusätz ab, so wie de Hillisch Bernd

Sie: Du mannst, der kriescht genauso viel Monete, ob der jetzt in de Fabrikhall steht oder bei so äm Containerbrand ma kurz de Schlauch äneuhält?
Er: Ei sischer, un hinnerher noch ä schee Brandwach geschobe

Sie: Des iss mer de Rischdische, sisch freiwillisch von de Awweit drücke
Er: Un immer de erste am Ort des Geschehens, die Neuschier

Sie: Sach ma, kriesche die aach Kohle, wenn die wie letzt bei der Ehrung von de Torngemeinde hinne mit ihrne Uniforme dumm rumstehe?
Er: Ei klar, oder maanst du, die mache des freiwillisch?

Sie: Wenn mer schon ämol dodebei sinn, waast du was mer die Roth erzählt hat?
Er: Sischer, isch war ja dodebei

Sie: Wo warst dann du do debei?
Er: Ei fraach doch ned so dumm, ob isch des wüßt, wenn isch eh ned dodebei war

Sie: Also, die hat mer erzählt, daß de Picard Heinz kaa Woch nach seuner Ehrung bei de Torngemeinde aus’m Verein ausgetrete iss
Er: Ach komm!

Sie: Ei sischer, un waasde aach warum?
Er: Warum?

Sie: Weil einische von dene Lewwensmittel in dem Präsentkorb ‘s Verfalldatum schon längst üwwerschritte hatte
Er: Des iss awwer aach ä stark Stück, bezählt der fünfunzwanzisch Jahr Beitrach, nur das der dann ma geehrt werd und dann so was

Sie: Des war awwer kaan Zufall
Er: Hä?

Sie: Die hawwe mit Absischt so alte Dinger do äreugeleescht
Er: Du maanst, die hawwe de Picard äreugeleescht
Sie: So kennt mer’s aach saache un isch waas aach warum

Er: Ei warum dann, machs ned so spannend?
Sie: Ei, weil der mit seum Beitraach saache uns schreiwwe fünf Jahr im Rückstand war

Er: Nur fünf Jahr? Isch bin schon fünfunzwanzisch Jahr im Rückstand mit meum Beitraach bei de Torngemeinde

Sie: Du bist ja gar kaa Mitglied bei dene
Er: So weit käms noch, daß isch dene ihrne Tennisplätz finanziern däd, damit die Sonneanbeeder uff meu Koste dort ärumhippe könnde

Sie: Du bist halt ned so bleed wie der bleede Picard
Er: Isch geh ja aach ned in die Sonn un lass mer’s Gehirn uffkoche

Sie: Apropos koche, komm, de Laafer kimmt gleisch im Fernseh un kocht
Er: Bei der Hitz?

Sie: Iss ä Wiederholung!
Er: Dene fällt aach nix mehr neues eu, oder?

Sie: Ei sischer, die sinn mit ihrne Ideen halt aach ämol am End
Er: Oder in Urlaub

Sie: Sälber maa des knusbrische Hähnsche spiele, haasd des Motto uff Mallorca
Er: Schmore im eischene Saft, un dadezu gibt’s ä schee Tiroler Nussöl

Sie: Mahlzeit