von de Ginder (copyright)

Sie: Da gugg, wenn isch den Kerl da unne seh, wär isch schon dadefer, daß mer än fläschedeckende genetische Fingerabdruck eiführe däd
Er: Ei warum dann des?

Sie: Der sieht doch aus wie än Verbrescher
Er: Der sieht doch ganz normal aus, oder?

Sie: Waas mer’s, was so aaner uff’m Kerbholz hat?
Er: Also, isch bin da ned dadefer, für so ä fläschedeckende DNS-Analyse

Sie: Hast wohl was zu verbersche?
Er: Horsch ämol, daß die Politiker do ned dodefer sinn, iss mir ja schon klar, ei die weil die all irschendwo Dreck am Stecke hawwe, awwer isch bin sauber

Sie: Unn warum bisde dann gesche so ä Zentraldatei?
Er: Ei, stell derr doch ämol vor, die hätte alle männlische Daade gespeischert und jetzt kimmt aaner uff die Idee und klaut derr von deuner Haarberscht ä Haar unn geht dann irschendwo klaue unn läßt dann dei Haar am Tatort falle – zack hawwe se disch am Arsch

Sie: Wenn mer’s so sieht hasde ja rescht
Er: Saach isch doch

Er: Wo, im Knast?

Sie: Da gugg, der Hebert da unne, der soll sisch ja aach an de Börs ganz schee verspekuliert hawwe.
Er: Hat derr des die Roth erzählt?

Sie: Ei, wer dann sonst?
Er: Unn?

Sie: Der iss doch bei de Telekomm
Er: Unn?

Sie: Ei, der hat gedacht, er däd inne guud Firma awweide
Er: Ei die Telekomm, des iss doch ä guud Firma

Sie: Ob ä Firma guud iss oder ned, des bestimme immer noch die Aktionäre
Er: Unn, de Hebert, der had gedacht, daß er inne guud Firma awweide däd?

Sie: Der had gedacht, telefoniert wird immer unn da had der Aktije von seune Telekomm gekaaft
Er: Doch ned do, wo der Kurs von de Telekomm uff’m Höchststand war?

Sie: Genau do
Er: So än Dabbes, mer kaaft doch ned Aktije uff’m Höchststand

Sie: Des had der halt ned kapiert
Er: Unn jetzt guggt der blöd

Sie: Saublöd
Er: Isch werd des nie kapiern

Sie: Was?
Er: Wie merr Aktije uff’m Höchststand kaafe kann

Sie: Isch aach ned