Die Fenstergucker: Die Begnadischung dursch de Pfarrer
von de Ginder (copyright)
Sie: Gugg, die Schneidern, nach dene kannste die Uhr stelle
Er: Stimmt, es iss genau zehn vor zehn
Herr Schneider: Grüß euch Gott
Frau Schneider: Grüß Gott
Sie: En guude Morsche
Er: Moin
Sie: Zack, weg sinn se, un jetzt ab in die Zehnuhrmess, sich die Sünde vom Leib bede
Er: Von de Seel bede haasd des
Sie: Als hätte mir ä Seel
Er: Ei, es haasd doch „des iss ä guud Seel” oder „Iss die Seel krank, zieht de Körper nach”
Sie: Isch glaab des haasd awwer anners
Er: Jedenfalls so ähnlisch
Sie: Du, die Schneidern, die renne aach jeden Samsdaach zum Beichte, damit se Sonndaachs ruhischen Gewissens zur Kommunion gehe kenne
Er: Ei, wenn se so viel zu beischte hawwe, dann solle se aach ruhisch renne
Sie: Do sieht mer ma den Unnerschied
Er: Was für Unnerschied?
Sie: Ei, mir müsse zum Beischpiel ned beichte renne
Er: Ei, mir hawwe halt aach nix uff’m Kerbholz
Sie: So sinn se, die Kerscheleefer, die ganz Woch sündische und Samsdaach wird die Absolution erteilt
Er: Die was?
Sie: Deppel, des ist die Begnadischung dursch de Pfarrer
Er: Wenn isch mer so vorstell, isch däd zu dem Pfarrer gehe, isch wüst gar ned, was isch dem saache sollt
Sie: Du bist ja aach kaan SM
Er: Än was?
Sie: Ei, so än Sado Maso
Er: Jetzt hör awwer uff, du
Sie: Isch maan ja nur, vielleischt sind die Schneiders Sado Maso’s un Saamsdaach krieschd de Pfarrer den ganze Schweinkram erzählt
Er: Des iss schon än harte Beruf, so än Pfarrer, sich dauernd so än Schweinkram anhörn zu müsse
Sie: Stimmt, do muß’ de ganz schö abgehärt seu
Er: Oder der Pfarrer iss selber so än SM
Sie: Uff die Idee bin isch noch gor ned gekomme
Er: Apropo SM, wenn mer schon ämol dadebei sinn, was haasd dann eischendlisch SMS, was die Juchend-lische mit ihrne Hendis so treibe?
Sie: Wahrscheinlisch haasd des Sado Maso Schweinkram
Er: Die ganz Juchend wird mit so äm Scheiss versaut
Sie: So SMS gehörde verbote
Er: Un was macht die Reschierung?
Sie: Nix, ganz im Gescheteil, die verkaafe aach noch ‘s letzte freie Funkloch mit ihrne UMTS Lizense
Er: Was haasdn eischentlisch UMTS?
Sie: Kaa Ahnung. Awwer mer könnt sich ja was zusammereime
Er: Reime ma!
Sie: Des M steht bestimmt für Maso und des S für Sado
Er: Un des U und des T?
Sie: Kaa Ahnung, vielleischt U für Ultracool und T für Transsexuell
Er: Die ganz Welt iss verriegd geworn, jetzt derfe ja sogar Transsexuelle heirade
Sie: Du mannst Homosexuelle
Er: Ei saach isch doch
Sie: Un unser Pfarrer traut die dann aach noch
Er: Sauerei. Do brauche die sisch ned wunnern, wenn die Kersche immer leerer wern
Sie: Des iss doch des, was uns Katholike so an die Wand drückt
Er: Was?
Sie: Die sündhaftische Menschheit, du Dabbes
Er: Ach so! Ja, stimmt!