Die Fenstergucker: De Hochdruckreinischer
von de Ginder (copyright)
Sie: Manchma, da könnt isch die Elsbeth verfluche
Er: Isch geh gleisch in die Drogerie und kaaf ä paar Oropax
Sie: Wie kann mer dann nur seum Sohn zu Ostern än Hochdruckreinischer schenke, kannsde mir dess ämol saache?
Er: Du, isch waas aach ned, wiemer uff so aa Idee komme kann, des hat die Elsbeth garantiert mit Absischt gemacht, um die Nachbarschaft zu äern
Sie: Un de Karl-Heunz mäscht jetzt des Hochdruckreinische zu seim neue Hobby
Er: Die Platte vom Hof hatter ja jetzt ferdisch, isch bin gespannt, was jetzt dro kimmt
Sie: Isch hab mers gedenkt, jetzt wird de Büjersteisch behandelt, als däd des Wasser nix koste
Er: `S wird Zeit, daß ma widder de Wassernotstand im Rhein-Maingebiet ausgerufe werd, daß der Scheissdreck do uffhört
Sie: Naa, naa, naa, als däd des wöchentlische kehrn ned lange – geb äm Mann ä neu Spielzeusch in die Hand und er läßt’s nedmer los
Er: Do fällt mer eu, daß mer ja dem klaane Stephan noch gor nix zum Gebortsdaach gekaaft hawwe
Sie: Wenn de deun Neffe äern willst, dann kaafsde dem Stephan so ä üwwerdimenional Wasserpistol
Er: Wieso äer isch den dodemit?
Sie: Weil der dann aadauernd von seum Filius aagespritzt wird
Er: Isch glaab, isch kaaf mer so ä Ding und spritz dodemit den Karl-Heunz ämol ins Genick
Sie: Dem gehört werklisch ins Genick geschlaache, jetzt spritzt der aach noch die Kellerfenster ab
Er: ‘S gibt doch werklisch nur noch bleede uff dere Welt, gugg derr nur den Jugo aa, der do mit ins All gefloche iss
Sie: Ei, isch denk des wor än Ami?
Er: Tito iss awwer doch kaan Aminame
Sie: Der iss doch Millionär, der had sisch bestimmt die amerikanisch Staatsbüjerschaft gekaaft, wie den Fluch do änuffer aach
Er: Du siehst, mit Geld kann merr sich alles kaafe, Hochdruckreinischungsgeräte oder Flüsch ins Weltall
Sie: Mescht ma wisse, wie der Tito do zu seune Millione gekomme iss – mit ehrlischer Awweit bestimmt ned
Er: Der iss bestimmt so’n Boss von de Jugo-Mafia
Sie: Könnt seu, des paßt ja aach zusamme, Jugo-Mafia und Russe-Mafia
Er: Von euner Hand in die anner und widder zurück
Sie: Zwanzisch Millione Euro, merr gönnt sisch ja sonst nix, unn in Afrika do verhungern die Kinner
Er: Do hasde rescht. Unn zum Schluß wern mir widder uffgerufe, do was zu spende
Sie: Awwer ned mit uns
Er: Nee, solle die Reische des ma mache, anstatt ‘s Geld so zu verplempern
Sie: Jedenfalls ham mir noch Träume unn der Tito ned mehr
Er: Wieso had der jetzt kaa mehr unn mir ham noch welsche?
Sie: Mir könne noch dodefo träume, ma ins All zu fliesche, der kann des ned mehr, der war jo schon do owwe
Er: So gesehe ham mir werklisch noch Träume
Sie: Gugg, der Karl-Heunz hat endlisch uffgehört mit dem Scheissgespritze
Er: Jetzt kimmt der aach noch zu uns ärüwwer der Nervtöter
Karl-Heunz: Habder gesehe, wie schee sauwwer alles werd mit meum neue Hochdruckreinischungsgerät?
Sie: Wunnerschee, awwer ä bissi laut iss es schon, gell!
Karl-Heunz: Ach, do gewöhnt merr sich schnell dro. Isch wollt eusch fraache, ob isch euch ma oobiete kann, ob isch ned euern Hof aach ma abspritze soll, wenn isch schonämol dodebei bin?
Er: Du Karl-Heunz, mit dem Abspritze do ded isch awwer ämol vorsischtisch seu
Karl-Heunz: Ei wieso dann des?
Er: Wenn mer do bei dem Gerät de Druck zu hoch eustellt, do könne leischt die Farbpikmente von de Hofplatte ärausgepritzt wern
Karl-Heunz: Ehrlisch?
Er: Ei sischer doch, unn dann hasde bald än ganz unansehlische Hof
Karl-Heunz: Gut, daß de merr des sächst, do wird isch do ämol vorsischdisch seu. Unn was iss mit äm Büjersteisch?
Sie: Meun Olli mescht des schon, sonst had der jo gar keu Beweschung mehr, awwer des iss werklisch lieb von dir gemaant mit dem Aagebot
Karl-Heunz: Na dann nix für ungut, awwer saacht merr bescheid, wenn isch ma die Dachzieschel von euerm Schuppe abspritze soll
Sie: Mache merr doch glatt, merr wisse ja jetzt wo merr so ä Gerät kriesche
Karl-Heunz: Machts gut
Er: Mach’s besser
Sie: Grüß mer die Elsbeth
Karl-Heunz: Mach isch
Sie: Stimmt des eischendlisch mit dene Farbpigmente?
Er: Quatsch, der Karl-Heunz, der iss doch zu doof um ä Schaufensterpupp umzuschmeisse
Sie: Do hasde rescht, dem kannste saache, daß Kotflüschel beim Auto stinke, dann glaabt der des
Er: Awwer des Moos uff’m Schuppe könnt merr schon ma abspritze
Sie: Wenn de nix zu tun hast, saach mer’s, isch hab schon Awweit für disch
Er: War ja nur än Vorschlaach
Sie: Wobei die Betonung uff Schlaach liescht
Er: Iss ja guud